Қолға ілінгенді, ақша болады-ау деген титтей бұйымдардың барлығын үптеп кететін әмбебап ұрылар көбейіп тұр бүгінде. Сәби жаялықтарын да ұрылар кәдеге жаратады деп кім ойлапты?!… Түркістан облысына қарасты Мақтаарал ауданы ПБ-ға жергілікті тұрғын ұрлық жайтының құрбаны болғандығы жөнінде арызданып келген. Жәбірленуші әйелдің айтуынша түнгі уақытта ауласында орналасқан сарай ішіне белгісіз азамат кіріп, 1 дана бұрғылағыш құралын, 200 дана «Комбайн» жүк көлігінің бөлшек жабдықтарын, сондай-ақ 120 дана балаларға арналған жаялықтарын жымқырып кеткен. Келтірілген жалпы шығын көлемі 450 000 теңгеге жуық. Полиция қызметкерлері аталған жайтты ҚР ҚК-нің 188-бабы, яғни «Ұрлық» қылмыстық құқық бұзушылығы бойынша тіркеді. Хабар алысымен аталған қылмысты ашу мақсатында мақтааралдық тәжірибелі полиция қызметкерлерінен жедел-тергеу тобы құрылды. Жедел уәкілдер қажетті іс-шаралар кешенін жүргізіп, жақын маңдағы аумақтарды аралап, куәлардан сұрастыру жұмыстарын жүргізді. Тәртіп сақшылары тыңғылықты жүргізілген істің нәтижесінде, жан-жақты жинақталған мәліметтерді саралай келе, аталған іске күдікті ретінде бұрын сотты болған ер азамат ұсталды. Ол жергілікті тұрғын болып шықты. Қазіргі таңда аталған жайтқа байланысты күдікті қамауға алынып, тергеу амалдары жүргізілуде. Белгілі болғандай күдікті оңай жолмен ақша табуды көздеген. Осылайша алдын-ала жоспарлап жәбірленушінің үйіне ұрлыққа түскен. Қолды болған заттарды үйіне тығып сатпақ болған. Бүгінде қолды болған заттар заңды иесіне қайтарылды. Әрине ауылдағы ағайын үй ауласындағы сарайға ұры түседі деп ойламайтын болса керек. Сондықтан да оны құлыптап жүру ойларына да келмейтін сияқты. Бейнебақылау орнату туралы тіптен әңгіме жоқ. Дегенмен тәртіп сақшылары тұрғындардың өз дүние мүліктеріне барынша ықтиятты болу қажеттігін ескертеді.
