Өңір басшысы Б.Атамқұлов облыстағы бизнесмендермен кездесті. Кәсіпкерлер форумына 200-ден астам бизнесмен мен құқыққорғау органдарының жетекшілері, облыстық басқармалар басшылары мен аудан, қалалардың әкімдері қатысты. Кездесуде облыс әкімі 200-ден астам кәсіпкерді Елбасының 5 институционалды реформасын жүзеге асыруға бағытталған «100 нақты қадам» Ұлт жоспарының үшінші бағытында көрсетілгендей аймақтағы индустрияландыру мен экономикалық өсімді арттыру үшін алдағы бес жылға жасаған жобасымен таныстырды. Кәсіпкерлік саласына жасалған талдау нәтижесінде өңірдегі бизнестің дамуына кедергі келтіретін мәселелерді шешу үшін аймақ басшысы бірқатар бастаманы ұсынды. Оның алғашқысы кадр мәселесіне қатысты. Яғни, кәсіпкерлік пен мемлекеттік қызметтегі кез келген мәселені тиімді әрі жан-жақты шешу үшін кәсіби және жоғары білікті мамандарды іріктеу саясатына ашықтық орнатамыз деді Б.Атамқұлов. Екінші бағыт — Шымкентті үшінші мегаполиске айналдыру. Яғни, бизнесті дамытуға қолайлы аймақта шаһардағы нысандар мен ғимараттар барлық талаптарға сәйкестендіріліп, кәсіпкерлікті өркендетуде әкімшілік кедергілер жойылуы керек. Туризм орталығына айналуы тиіс шаһарда 2016 жылдан бастап муниципалды полиция жұмыс істейтін болады. Облыстағы туризмді дамыту өңір басшысының ұсынған үшінші бастамасы болып табылады. Ол бойынша қазір 4 зәкірлік жоба әзірленген. Оның бірі Сарыағаш ауданында құрылысы жүретін «Сарыағаш» курорттық аймағы болса, екіншісі Шардара су қоймасының маңында жұмыс істейтін жағажай туризмі. Облыста аталған саланы дамытуға Қасқасудағы тау шаңғысы курорты жобасы мен Түркістанда тарихи-зиярат туризмі орталығын қайта жаңғырту жобалары да кіреді. ОҚО-дағы кәсіпкерліктің өркендеуі үшін өңір экономикасына инвестиция тартып, жергілікті тауар өндірушілердің жұмысын жолға қою қажет. Бұл аймақтағы бизнесті жандандыруға себеп болатын төртінші бағыт. Сондай-ақ, суармалы жер көлемін ұлғайтып, оның жағдайын жақсарту да негізгі бағыттардың біріне жатады. Шешу жолының бесінші бағыты бойынша шаруаларға төмен пайызбен берілетін несие көлемі көбейтіліп, әр ауданнан машина-трактор стансасын құру көзделіп отыр. Және ондағы кәсіпкерлік мектептерінің жанынан шаруаларға арналған ғылыми-кеңес орталығы ашылып, жаңа технологиялар орталығы құрылмақ. Б.Атамқұлов ұсынған алтыншы бағытқа кәсіпкерлерге төмен пайыздық ставкамен берілетін несиелендірудің көлемін арттыру және оны қолжетімді ету кіреді. Сондай-ақ, өз кәсібін дамытуда бизнесмендер мемлекет пен қоғам алдындағы әлеуметтік жауапкершілік туралы ұмытпай, атсалысуы керек. Сонымен қатар, облыс әкімі әрбір оныншы жұмыс орынына мүмкіндігі шектеулі азаматты алу мәселесіне бизнесмендердің бей-жай қарамауын өтінді. Айта кетейік, облыста ҮИИД бағдарламасы бойынша 137 жоба іске қосылған. Аталған мемлекеттік бағдарлама аясында ОҚО республикада көш бастайды. Жыл басынан бері облыстық кәсіпкерлер палатасына 233 бизнесменнен түрлі мәселелер негізінде арыз-шағымдар түссе, оның 64-і азаматтардың пайдасына шешілген. Осы жұмыстардың арқасында кәсіпкерлер 217 миллион теңгесін үнемдеуге мүмкіндік алған.
ОҚО әкімінің баспасөз қызметі
