Бүгін Шымкентте «Ontustik Invest-2016» атты халықаралық инвестициялық форум басталды. Осы форум аясында оңтүстікқазақстандық тауарөндірушілерінің көрмесі ашылды. Көрменің ашылу салтанатына өңір басшысы Б.Атамқұлов, Түркияның экономика вице-министрі Фатих Метин қатысты. Аталған жиында сөз алған облыс әкім барша қатысушыларға алғысын білдіріп, форум жұмысына сәттілік тіледі. Оңтүстік Қазақстан облысы бизнеске қолайлы аймақ екенін айтқан Фатих Метин бүгінгі өткізіліп жатқан халықаралық форумның маңыздылығын жеткізді. Көрмеге, өңіріміздегі өңдеу өнеркәсібінің барлық салаларында өнім өндіретін, 60-тан астам тауар өндірушілері қатысуда. Онда ұсынылған өнімдердің басым бөлігі индустриалдандыру бағдарламасының бірінші бес жылдығы шеңберінде іске қосылған зауыттарда өндіріледі. Соңғы бес жылда облыста 164 жоба жүзеге асты. Бұл республикадағы индустриалдандыру бағдарламасы шеңберінде іске қосылған жобалардың әрбір бесінші жобасы болып табылады. Бұдан бөлек, көрмеде әлеуетті инвесторларға арналған 50-ге жуық инвестициялық жобалар ұсынылуда. Шетелден келген қонақтарға «біздерде мынадай бар, мынадай бар…» деп мақтанып көрсетуге тұрарлықтай нешетүрлі өнімдеріміз көздің жауын алып, менмұндалап тұрды. Облыс әкімі айтқандай Еуропа елдерінде өндірілген өнімдерден бірде кем емес өнімдеріміз расында қонақтардың қызығушылығын тудырды. «Баль Текстиль», «Назар Текстиль», Кентау трансформатор зауыты, «Карлскрона», «Алтын дән», «Ордабасы құс» секілді бүгінде шетелдерге өнімдерін экспорттауды жолға қойған алпауыт кәсіпорындар көрмеде өз өнімдерін қойды.
