Мал бордақылаумен айналысатын кәсіпкерлер қатары артуда Түркістан облысына қарасты Сарыағаш ауданы экономикасы қарқынды дамып келе жатқан әлеуеті зор аудан. Бүгінде мұнда ауыл шаруашылығы мықтап дамыған. Аудан әкімі Мұхит Баймұханбетұлы Қызылжар ауылдық округіндегі жеке кәсіпкер Орынғазы Қарабаевтың тұрғын үйі жанынан ашылған мал бордақылау алаңына арнайы барып, жұмысымен танысты. — Ауданда халықтың тығыз орналасуына байланысты, жайылым жер тапшы болғандықтан осылай үй жанынан мал бордақылау алаңын салу өз тиімділігін көрсетуде. Соңғы жылдары тұрғындар қолындағы азын-аулақ малының қарасын көбейтіп, бордақылау алаңдарын бірінен соң бірі ашуда. Бұл кәсіптің қиындығына қарамай білек сыбана осы жұмысты бастап, қолыңыздағы мал санын көбейтіп, бүгінгі таңда өз арбаңызды дөңгелетіп отырғаныңызды көріп, қуанып тұрмын. Жалпы қазіргі таңда кәсіп бастау оңай бырақ оны әрі қарай дамытушылар саны аз. Кәсібіңіз өсіп өркендей берсін,-деді аудан басшысы. Аталған мал бордақылау алаңында қазіргі таңда 35 бас ірі қара мал өсіріліп, 2 адам тұрақты жұмыспен қамтылған. Жеке кәсіпкер аудан басшысымен тілдесе келе, өз жоспарларымен бөлісті. Оның айтуынша алдағы уақытта мемлекеттен жеңілдетілген несие алып, өз кәсібін ұлғайтып, ауыл тұрғындарын тұрақты жұмыспен қамтуды жоспарлап отыр. Жалпы аудан аумағында аталған кәсіппен шұғылданатын кәсіпкерлер саны күн санап артуда. Бұл өз кезегінде бәсекелестікті ұлғайтып өнім көлемінің артуына, ал нарықтағы бағаның төмендеуіне алып келеді. Айта кетсек, аудан бойынша жалпы 115 мал бордақылау алаңы бар, оның 3- ірі алаңдар болса, 112- шағын алаңшалар. Бүгінгі таңда ауданда 61417 бас -ірі қара мал, 19660 бас — жылқы, 495369 бас -уақ мал, 117 — бас түйе өсірілуде. Ағымдағы жылдың 9 айында 23,7 млрд теңгеге малшаруашылығы өнімдері өндірілді.
