Үлкен еңбектің соңы – үлкен табысқа алып келеді Биыл қант бағасы қатты қымбаттап, алаңдатып қойғаны рас. Енді алдағы уақытта түркістандық шаруалардың арқасында қант бағасы тұрақтанатын болады. Түркістан облысы, Мақтаарал ауданы А.Қалыбеков ауылдық округінің диқандары ерте пісіп жетілетін қант қызылшасының алғашқы өнімін Ресейге экспорттады. Ауыл диқандары Голландиядан арнайы жеткізілген павло, вадан атты қызылшаның жоғары сұрыптарын қаңтар айында үй іргесіндегі жалпы 25 гектар алқапқа еккен болатын. Жаңажол ауылының тұрғыны Бектемір Алиқұлов алғашқы болып өзінің үй іргесіндегі 15 сотық жерден 1,5 тонна өнім алып үлгерді. Шаруаның гектарына шаққанда 300 центнерге дейін өнім алуға мүмкіндігі бар. Қазіргі таңда келісін 180 теңгеден саудалауда. Диқан жоғарыда аталған сорттар дәл осы Жаңажол ауылының топырағында өсіп шыққанда ғана ерекше дәмге ие болатынын, сондықтан мұнда қызылшаға жоғары сұраныс бар екенін жеткізді. «Қызылша егілетін жер өте құнарлы болуы тиіс. Ол үшін селитра, аммофос, малдың қилары арқылы жер тыңайтылады. Агротехникалық шаралардың басым бөлігі қолдың күшімен істелетіндіктен қызылша егу үшін қажырлы еңбек керек. Үлкен еңбектің соңы – үлкен табысқа алып келеді», – дейді Б.Алиқұлов. Жалпы округ аумағында шаруалар Рессейге және еліміздің Нұр-Сұлтан, Алматы, Қарағанды қалаларына өнімдерін жөнелтуде. Қант қызылшасын толық жинап алған соң, диқандар екінші өнімге дақылдарды егуді жоспарлап отыр. Алдағы уақытта еккен дақылдар өз жемісін беріп жатса, экспорт көлемі де едәуір ұлғаймақ. Алқап жерін игеруде қосымша жұмыс күші де тартылатын болады.
