Түркістан облысы әкімінің орынбасары Ермек Кенжеханұлы Мақтаарал ауданына жұмыс сапарымен келіп, ауданға тартылып жатқан инвестициялық жобалар және ауыл шаруашығы саласындағы бірқатар жұмыстармен танысты. Ең алдымен облыс әкімінің орынбасары «Ауыл аманаты» пилоттық жобасына енген А.Қалыбеков ауылдық округі және Достық ауылдық округінде тұрғындар тарапынан іске асырырып жатқан жобалар жайлы кеңінен ақпарат алды. А.Қалыбеков ауылдық округінде үй іргелік жерлерді тиімді пайдалану бойынша 79 жоба, техника сатып алу бойынша 13 жоба, мал шаруашылығы бойынша 18 жоба, өз кәсібін ашу бағытында 16 жобаны іске асыру бойынша жұмыстар жүргізілуде. Ал, Достық ауылдық округі бойынша мал шаруашылығы бағытында 17 жоба, техника сатып алу бойынша 19 жоба, жылыжай ашу бойынша 20 жоба тіркеліп, жобаларды несиелендіру бойынша жұмыстар іске асырылуда. Облыс әкімінің орынбасары аталған жобалар ауыл тұрғындарының табысын арттырып, халықты қосымша жұмыспен қамтуға негіз болуы керектігін айтып, жобаны сапалы іске асыру керектігін тапсырды. Бүгінде су ресурстарын дамыту басты мәселе екені анық. Осы орайда Ермек Кенжеханұлы Мақтаарал ауылдық округінде орналасқан К-20 каналының мәселесімен танысты. Жалпы ұзындығы 27 шақырымды құрайтын канал 10832 гектар егін алқабына ағын су жеткізіп беруде. Бүгінгі таңда каналдың 91 ішкі жүйесіне ПУИД-2 бағдарламасы аясында жөңдеу жұмыстары жүргізіліп жатыр. 2022 жылы канал 175,3 миллион теңгеге сатып алынып, коммуналдық меншікке өткізілді. Сондай-ақ, облыстық бюджеттен 53 миллион теңге қаржы бөлініп, сметалық құжаттары әзірленді. Аудан әкімі Б.Асанов пен шаруалар облыс әкімінің орынбасарынан келесі жылы каналдың 27 шақырымын толық бетондау үшін тиісті министірліктен қаржы бөлдіруге ықпал жасауды сұрады. Мақтарал ауылдық округінде орналасқан «Мырзашөл-құс» ЖШС өз қаржаты есебінен 850 миллион теңгеге құс етін және жұмыртқа өндіру фабрикасының құрылысын жүргізуде. Жыл соңына дейін зауыттың құрылыс жұмыстары толық аяқталып, жылына 5 мың тонна құс етін және 20 миллион дана жұмыртқа өндірілетін болады. Ермек Кенжеханұлы аталған алып фабриканың құрылысымен де таныс болып, өңірде осыған ұқсас кәсіпкерлік жобаларын көбейту керектігін тілге тиек етті. Мақтаарал ауданында өзбекстандық «Clobal Textile» компаниясының сүйемелдеуімен Мақтаарал ауылдық округі, Өркениет елді мекенінде шаруалар тарапынан 15 гектар жерге эксперимент ретінде мақтаның «Наманган» тұқымы егілген болатын. Биылдың өзінде аталған компания Мақтаарал ауданында 10 мың гектарға жуық жерге «Сұлтан» және «Наманган» тұқым сорттарын жеткізуді және күзге қарай аталған сорттардың мақта талшығын сатып алуды жоспарлап отыр. Кәсіпорынның ендігі мақсаты — Мақтаарал ауданында 2 мыңнан астам адамды тұрақты жұмыс орнымен қамтитын 5 ірі кәсіпорынды іске қосу. Ол үшін 2023-2027 жылдарға арналған «Global textile. Turkistan» жобасы дайындалған. Құны 45 миллион долларды құрайтын жоба аясында логистика хабы, мақтаны бастапқы өңдеу зауыты, трикотаж мақта фабрикасы, мата боя фабрикасы және тігін фабрикалары іске қосылатын болады. Мақтааралдағы өзбекстандық компанияның тұқым жеткізу жоспарымен танысып болған облыс әкімі орынбасарының соңғы барған нысаны — Мақтаарал ауылдық округінде орналасқан «Шайдар» шаруа қожалығы. Мәділхан Қадырқұлов басшылық ететін қожалық биыл 11,6 гектар жерге ерте пісетін қырыққабат дақылын егіп, 10-15 күнде өнімін жинап алып Ресей және ТМД мемлекеттеріне экспортқа шығармақшы. Қожалық басшысы гектарынан 35-40 тонна өнім алуды жоспарлап отыр.
