ОҚО Созақ ауданындағы Шолаққорған ауылында орталық стадион пайдалануға берілді. Оның ашылу салтанатына аудан әкімі М. Исаев, ардагер спортшылар, аудан тұрғындары қатысты, деп хабарлайды Созақ ауданы әкімінің баспасөз қызметі. Аймақ басшысы сол жиында: «Орталық стадионда алдағы уақытта түрлі спорттық әрі мәдени шаралар өткізетін боламыз. Ауыл тұрғындары спортпен айналысып, Елбасы Жолдауындағы бұқаралық спортты дамыту бағытындағы жұмыстар жандана түседі», – деді. Сондай-ақ, ардагер спортшы Т. Батыров та құттықтау сөз сөйлеп, Созақ спортының соңғы жылдарда өсіп өркендеп, үздік нәтиже көрсетіп жатқанын атап өтті. Созақ ауданының 80 жылдығы қарсаңында салынған бұл стадион аудандық балалар мен жасөспірімдер футбол мектебінің қарамағында. Бірақ оған салынғаннан бері жөндеу жасалмаған. Енді міне, «Жол картасы 2020 бағдарламасы» бойынша күрделі жөндеуден өткен стадион, Тәуелсіздігіміздің 25 жылдығы қарсаңында халықтың іске қосылып отыр.
