Бүгінде Оңтүстік Қазақстан облысындағы барлық ауыл, аудандарды таза ауыз сумен қамту жұмыстары күн тәртібінде тұр. Соның арқасында тіршілік нәрімен қамтылған ауылдардың қатары артып отыр. Сарыағаш ауданының Ошақты ауылдық округіндегі Саңырау елді мекеніне таза ауыз су берілді. 2016 жылдың маусым айында басталған ауыз су құрылысы жұмыстарын мердігер мекеме «Үш-Сай» ЖШС-і жүргізді. Бүгінде 386 отбасы таза ауыз суға қол жеткізіп, коммуналдық қажеттілік шешімін тапты.Ел қуанышын бөлісе келген аудан әкімі Қ.Әбдуалиев Тәуелсіздік жылдарында қол жеткізген жетістіктер жайын баяндап, тіршілік нәрі келгені әрбір үйге үлкен мереке екенін атап өтті.Жалпы ауданда 154 елді мекен болса, оның 69 елді мекені ауыз сумен қамтылған. Ал 2017 жылға 32 елді мекенге ауыз су тарту мақсатында жобалық сметалық құжаттары дайындалуда.
