«Ұлы дала елі — Тәуелсіздіктің 25 негізі» 25 жұлдызды күн акциясы аясында түрлі қызықты іс шаралар легі толастар емес. Бүгін облысымыздағы түрлі этнос жастарының қатысуымен «Қазақстан Республикасының Тәуелсіздігіне 25 жыл» тақырыбында шығарма жазудан байқау өтті. ОҚО әкімі аппаратының «Қоғамдық келісім» КММ ұйымдастырған шараға жоғары және арнаулы оқу орындарынан және мектептерден 60 жас қатысты. Іс-шараға облыс әкімі аппараты «Қоғамдық келісім» КММ директоры Е.Байқонақов қатысып, барша қатысушыларға сәттілік тіледі. Еліміздің Тәуелсіздік жылдары қол жеткізген жетістіктеріміз жайлы қалам тербеген жастардың шығармаларын арнайы құрылған қазылар алқасы бағалап, үздік деп танылған сегіз туындыны республикалық байқауға жолдады. Тілдері түрлі болғанымен қазақ тілінде Тәуелсіздік жетістіктерін төгілтіп тұрып жазған шығармалар расында бірінен бірі өтеді. Бір елде тұрып, қазақ жұртының кеңпейілдігі хақында тебірене жазғандары расында көңіл толқытарлық. Одан бөлек Тәуелсіздіктің тамаша жетістіктері туралы шығармалардың өзі бір төбе. Күнгейдегі түрлі этнос жастарының тағлымды шығармалары республикалық бәйгеде оза шауып, бас жүлдені иемденетініне сенім мол.
