Мәдени ошақ болып саналатын мұражайлар облысымызда аз емес. Тарихи-өлкетану мұражайынан бастап бейнелеу өнері мұражайы, одан бөлек еліміздің өркендеуіне өлшеусіз үлес қосқан тұлғаларға арналған қаншама мұражайлар бар. Көне жәдігерлердің бүгінгі куәгерлеріндей мұражайларда жинақталған дүниелер сан ғасырлардан сыр шертеді. Сондықтан да бүгінгі ұрпақты еліміздің тарихына қанықтырып, әр ғасырда орын алған тарихи оқиғалардан хабардар болуы үшін мұражайларға жиі барып тұруына жағдай жасау керек-ақ. Осы мақсатта жуырда Оңтүстік Қазақстан облыстық білім, жастар саясаты және тілдерді дамыту басқармасының тапсырысымен «ТҰРАН» талантты жастар одағының ұйымдастыруымен Шымкент қаласындағы «Тарихи-өлкетану» мұражайында «Мұражайдағы түн» акциясы өткізілді. Аты айтып тұрғандай бұл шара түнгі уақытта өтті. Жасырары жоқ, жастар мұражайға барғылары келгенімен бірі күндіз оқуда, жұмыста болатындықтан үнемі мүмкіндіктері бола бермейді. Алдағы уақытта жалғасын табатын шара арнайы жастар үшін қолға алынып отыр. Шараның негізгі мақсаты – жастарға Қазақ тарихын таныту, ұлттық салт-дәстүрді насихаттау, өлке тарихынан да хабардар болуы үшін осындай насихат кештерін ұйымдастыру. Мұражай қызметкерлері мұнда бас сұққан жастарға жалықпай жәдігерлермен таныстырып шығады. Осы акцияның арқасында мұражайға келуге жолы түспей жүрген жастарға мол мүмкіндік бермек. Мұражайдың әрбір көне жәдігерлерімен жіті танысып, ұлттық салт-дәстүр мен тарихтан мол мағлұмат алып, рухани байып қайтуына болады. Болашақ жоспарда Шымкент қаласына оқуға түскен 1 курс студенттерін еліміздің тарихы мен қала тарихын, мәдениетін насихаттау мақсатында Шымкент қаласында орналасқан барлық мұражайларға «1 курс студенті мұражайда» апталығын өткізу жоспарлануда. Әрине аталмыш акция тегін түрде жүзеге асырылады. Шараға облыстық білім, жастар саясаты және тілдерді дамыту басқрамасы басшысының міндетін атқарушы Жанәбіл Болат Серікұлы қатысып, ұйымдастырушы жастарға ақжол тіледі. Сондай-ақ белсенді жастардың ұйымдастыруымен облыстық Отырар ғылыми-әмбебап кiтапханасында «Кiтапханадағы түн» атты акциясы өттi. Заманауи талаптарға сай салынған жаңа кітапхананы аралап көрген жастар мұндағы қолға түсе бермейтін сирек кітаптар қорымен де танысты. Бүгінде жастардың кейбірі кітап оқығаннан көрі ұялы телефонға үңіліп, түрлі әлеуметтік желідегі дүниелерді қызықтайтыны қанша жасырсаң да аяғы ашылып қала беретін ақиқат. Сондықтан да жастарды кітап оқуға үгіттейтін осындай шаралар көптеп ұйымдастарылса да аздық етпейтіні анық. Бұл акцияның мақсаты жастарға кiтаптың маңыздылығын ұғындыру, кiтапхананың тұрақты оқырманы болуға шақыру еді. Акция аясында Қазақ хандығының 550 жылдығы, Ұлы отан соғысына 70 жыл тақырыптарында жастар арасында викториналық жарыс өттi. Түрлі тақырыптағы сұрақтарға таласа – тармаса жауап берген жастардың білім көкжиегінің кеңдігі сүйсінтті. Белсенділік танытып, сұрақтарға дұрыс жауап берген студент жастарға Абайдың қара сөздерi, Шерхан Мұртазаның «Бiр кем дүние» кiтаптары сыйға берiлдi. Қатысушылар арасында ең белсендi болған Бекзат Ахмедке Абай Құнанбаевтың 170 жылдығына орай «Абай жолы» романы арнайы сыйлық тарту етілді. Ұйымдастырушыларға оң баға берген жастар алдағы уақытта мұндай шаралар жалғасын тапса екен деген тілектерін жеткізді. Осыған байланысты әр айдың 30 күнi Отырар кiтапханасы түнгi 00:00-ге дейiн жұмыс iстейтiн болып келісілді. Кей уақыттарда бос болып тұратын оқырман залдары енді кітапқұмар жастардан босамайтын болады. Бүгінде түрлі сайттарда кітап қоры, одан қала берді аудиокітаптар бар. Бірақ қай-қайсы да том-том кітаптарды қолға алып оқығандай болмасы анық. Кітапханашылар жастарға түрлі кітаптарды екі аптаға дейін тегін, үйге алып кетуге болатынын айтты. Бұл ұсыныс жастарға да ұнады.
