17 қыркүйектен бері Ашхабадта жабық кешендегі Азия ойындары өтуде. Биыл бесінші рет өтіп жатқан жарысқа әлемнің 65 елінен спортшылар қатысып отыр. 21 спорт түрінен медаль жиынтығы сарапқа салынатын бұл жолғы доданың ерекшелігі – Азия мемлекеттерінің ғана емес, Австралия, Фиджи, Самоа сияқты мұхит аймағының спортшылары да бақ сынауда. Сонымен бірге, алғаш мәрте қазақ күресі Азия ойындарының бағдарламасына енгізілді. Қазақстан құрамасы бүгінгі таңда спорттың 15 түріне қатысып, бақ сынап жатыр.
Азия ойындарында оңтүстікқазақстандық, Шардараның тумасы, белгілі палуан Ерсұлтан Мұзаппаров еркін және классикалық белбеу күресі, классикалық және еркін алыш, еркін және классикалық түрікмен ұлттық жекпе-жегі бойынша өнер көрсетуде. 90 келі салмақта кілемге шығып жатқан Ерсұлтан палуан кешегі күні белбеу күресінен ақтық сынға шығып, екінші орынды жеңіп алды.
Азиядағы мықтылардың алдыңғы қатарынан көрініп жүрген Ерсұлтан Мұзаппаровты алдағы уақытта да биік белестерден көрінеді деп сенеміз. Ерсұлтанның бағындырар биіктері мұнан да молаяды деген үміт бар.
