Бүгінде Оңтүстік Қазақстан облысында спорт саласына көптеп көңіл бөлінуде. Жүздеген спорт кешендері көпшіліктің игілігі үшін қызмет етуде. Алдағы уақытта бұдан да жоғары деңгейдегі спорт қалашығы салынуы мүмкін. Қалалық дене шынықтыру және спорт бөлімі жергілікті билікке спорттық қалашық салу туралы ұсыныс жасаған болатын. Аталмыш қалашық «Металлург» стадионында орын тебуі әбден мүмкін. Бұл жерде спорттың бірнеше түрімен айналысуға болатын кешендер тұрғызылады. Бүгінде тек жоба күйінше тұрғанымен, жүзеге асқан жағдайда болашақта ұрпақ игілігі үшін қызмет ететін болады. Аталған нысан жеке меншік иелігінде болғандықтан бүгінде келіссөздер жүргізілуде. Кезінде Абай саябағында орналасқан «Жастар» тойханасын жеке кәсіпкер мемлекет меншігіне қайтарып беріп, мәрттік жасаған еді. Бүгінде мұнда бейнелеу өнері галереясы ашылып, мәдениет саласына қызмет етіп отыр. Бұнда да бір Атымтай жомарттық танытатын азаматтар көп болса деген тілек бар. Егер осында спорттық қалашық салынатын болса онда бірінші болып еліміз бойынша тек біздің қаламызда болатын еді. Алдағы уақытта жастардың қызығушылығын оятып отырған кроссфит, стритбол спорт түрлеріне аса көп көңіл бөлінетін болады. Қазіргі таңда көше ойындарының бірі «Street workout»-тың қаламызда 4 алаңшасы жарақталып жатыр. Көше спортымен айналысатындардың қатары артуына байланысты алдағы уақытта тағы ықшамаудандардан алтауын салу жоспарлануда. Бұл жастардың бұқаралы спорт түрімен еркін айналысауына, бос уақыттарын тиімді пайдалануына мол мүмкіндік бермек.
Динар Бекасыл
