Оңтүстік Қазақстан облысының мәдениет басқармасының бастамасымен «Бейнелеу өнері музейі» МКҚК және Облыстық жасөспірімдер кітапханасының ұйымдастыруымен «Бір өлең – бір сурет» жастар арасындағы байқау – көрмесі өтті.Қазылар алқасының төрағасы ОҚО Бейнелеу өнері музейінің директорының орынбасары Е. Рүстембек, мүшелері Қазақстан суретшілер одағы ОҚОФ төрағасы Н.Шилибаев, ҚР мәдениет қайраткері, профессор Ә.Айдосов, Бейнелеу өнері музейінің меңгерушісі, магистр С.Баймырзаев, Облыстық жасөспірімдер кітапханасының директор орынбасары Г.Жанысбекова байқау—көрмені сараптап, жеңімпаздарды анықтады.Қазақ поэзиясының ірі өкілдерінің бірі Мағжан Жұмабаевтың «Батыр Баян» дастанының желісі бойынша салынған суреттер сан түрлі мазмұнмен ерекшеленді. Байқау—көрмеге 35 адам қатысып, қазақ халқын бірлікке үндеген хандардың, жастар арасындағы махаббатты, Баян батырдың өр тұлғасын, өкініші мен күйінішін кенепке түсірген нағыз таланттар жеңімпаз болды.Кәсіпқой суретшілер арасында бас жүлдені Ф.Достаев иеленсе, І—ІІІ орындарды Ш.Қалдыбек, М.Қосылханов, А.Қаныбек, С.Абдураимова, И.Исаков қанжығасына байлады.Жасөспірімдер арасында бас жүлде иегері Б.Темірхан, ал І—ІІІ орындардың иегерлері Амангелді Кәрім, А.Ошақбаева, Д.Аманылла, Ә.Әріпбай, М.Савицкая, М.Илиясова болды. «Ең үздік композиция» номинация Ұ.Қожанға, «Үздік мәнерлеп оқу» номинациясы А.Салыбекке берілді.
