2022 жылдың 1 қаңтары бойынша Түркістан облысы халқының саны 2 075 404 адамды құрады. Оның 433 780-і (20,9%) қалалық жерде, 1 641 624-і (79,1%) — ауылдық жерде тұрады. Республика бойынша облыс туу мен табиғи өсімі көрсеткіштері бойынша 1 орында. Бұл жайында брифингте Ұлттық статистика бюросының Түркістан облысы бойынша департамент басшысы Бағлан Қарғұлов мәлімдеді. «2021 жылы 13 897 неке тіркелді, бұл өткен жылдың тиісті кезеңмен салыстырғанда 3,2%-ға артқан. Тіркелген ажырасулар саны 2020 жылмен салыстырғанда 2021 жылы 36,6 пайызға азайды. Былтыр облыста 65 267 бала дүниеге келсе, қайтыс болғандар саны 13 560 адамды құрады», — деді Бағлан Абайбекұлы. Бұдан өзге, өткен жылы көші-қонмен облысқа келген халықтың саны 26 822 адамды құрады, оның 26 285 – Қазақстанның басқа облыстарынан, 516 – ынтымақтастық елдерінен, 21 адам – алыс шет елдерден келгендер.
