Ауыл шаруашылығын дамытуға өте қолайлы өңір Түркістан облысында бүгінде шаруалар көктмгі егіс жұмыстарын аяқтауға жақын. Тіпті көктемдік алғашқы өнімдерін жинап, сатуға шығарып жатқандары да бар. Қырыққабат пен асханалық асқабақты сатып үлгерген шаруашылықтар жетерлік. Жазы ыстық болатын Жетісай өңірі қауын, қарбызымен танымал. Арысы шетел, берісі Ресейге дейін экспортталатын жетісайлық өнімнің дәмі тіл үйіреді. Әрі ұзақ сақтауға болады. Түркістан облысына қарасты Жетісай ауданында өткен жылы суармалы егістік жерінің 15,2 мың гектарына бақша дақылдарын, соның ішінде 11 мың гектарға егілген қауын мен 4,2 мың гектарға егілген қарбыздан 418 мың тонна өнім алған жетісайлық шаруалар биыл 19 мың гектарға бақша, оның 14,4 мың гектарына қауын, 4,6 мың гектарына қарбыз егуді жоспарлап отыр. Өзге өңірлерге қарағанда көктемі ерте келетін Түркістан облысы, Жетісай ауданында жыл сайын ақпан айының соңында қауын егуді бастайтын жетісайлық диқандар биыл ауа-райына байланысты 10-15 күн кешігіп отыр. Әйтсе де, күн райының жылынғанын тиімді пайдаланған Ж.Ералиев, Атамекен, Қызылқұм, Ынтымақ, Жаңа ауыл, Жылы су және Қазыбек би ауылдық округтерінің диқандары 93 гектарға бақша дақылдарын егіп үлгерген. Оның 75 гектары қауын болса, 18 гектарына қарбыз егілген. Өткен жылы бақша дақылдары егілген 1311 гектардың 1084 гектарына қауын, 227 гектарына қарбыз еккен Жаңа ауыл ауылдық округінің шаруалары биыл 1500 гектарға бақша егуді жоспарлап отыр. Оның 1300 гектары қауын болса, 200 гектарына қарбыз көшеті отырғызылады. Бүгінгі таңда бақша дақылдары егілген 70 гектар егістіктің 60 гектары қауын болса, 10 гектары қарбызды құрап отыр.
