Жалпыадамзаттық және ұлттық құндылықтарға негізделген ұлт сапасын көтеру бағытындағы жұмысты үйлестіру, Мемлекет басшысы Қасым-Жомарт Тоқаевтың тәрбие жұмысын күшейту жөніндегі тапсырмасын, Оқу-ағарту министрі Ғани Бейсембаевтың біртұтас тәрбие бағдарламасы аясындағы нақты тапсырмаларын іске асыру мақсатында Түркістан облысына қарасты Төлеби ауданының орталығы Ленгір қаласындағы №7 IT мектеп-лицейінде республикамыз бойынша жүзеге асырылып жатқан біртұтас тәрбие бағдарламасына арналған кездесу өтті. «Ұрпақ тәрбиесі – ұлт болашағы» тақырыбында ұйымдастырылған аталмыш кездесуге Қазақстан Республикасы Оқу-ағарту министрлігінің тәрбие және қосымша білім беру департаментінің басшысы Меруерт Медетбекова, Ы.Алтынсарин атындағы ұлттық білім академиясының психология, тәрбие және тұлғаны дамыту орталығының директоры Анар Тәңірбергенова, Түркістан облысы білім басқармасының тәрбие бөлімінің бас маманы Клара Оспанова, Төлеби аудандық білім бөлімі басшысының міндетін атқарушы Бекайдар Тойлыбаев, Төлеби, Түлкібас және Қазығұрт аудандарының педагогтары, басқа да азаматтар қатысты. Жиын барысында педагог мамандардың беделін арттыру бағытындағы атқарылып жатқан жұмыстар да сараланды. Кездесу барысында қатысушылардың ұсыныс-пікірлері тыңдалып, көпшілікпен тиімді кері байланыс орнатылды.
