Түркістан облысына қарасты Төлеби ауданының мамандандырылған мектеп-интернатының 9-10 сынып оқушылары 2023-2024 оқу жылында іске асырылатын «Өнер мен құндылықтар», «Тарихқа құрмет», тіл саясатын дамыту жобалары аясында оқушыларды ұлттық және алпыадамзаттық құндылықтарға баулу мақсатында «Міржақып. Оян, қазақ!» фильмін тамашалап қайтты. «Қазақстан» телерадиокорпорациясы түсірген «Міржақып. Оян, қазақ!» көркем фильмді оқушылармен қоса бірқатар мектеп қызметкерлері және ұстаздар тамашалады. Фильм Алаш қайраткері Міржақып Дулатұлы өмірінің 1909-1935 жылдардағы кезеңін қамтиды. Міржақыптың «Оян, қазақ!» кітабының жарыққа шығуы, «Бақытсыз Жамал» романының жазылуы, революциядан кейінгі жылдардағы, ашаршылық кезіндегі қоғамдық-саяси қызметі, Қызылорда, Семей, Мәскеудің әйгілі «Бутырка» абақтысындағы жылдары және жан жары Ғайнижамалмен махаббат хикаясы фильмде кезең-кезеңімен баяндалады. Оқушыларға патриоттық тәрбие беруде нағыз қажетті дүние екендігі анық. Білімгерлер ұлттық рухты оятатын отты фильмді қызыға тамашалады.
