Ыбырай Алтынсарин атындағы Түркістан облыстық балалар кітапханасының ұйымдастыруымен өткен еліміздің ұлттық мерекесі 25 қазан — Республика күніне арналған апталықтың соңғы күні биыл екінші жыл тойланғалы отырған кітапханашылар үшін ерекше мейрам 24 қазан — Кітапханашылар күніне арналған салтанатты кешпен түйінделді. Кітапханашылар үшін ерекшелігі сол, ол марапат жауған мейрам болып есте қала беретін болды. Кітап оқу мәдениетін насихаттау жолында тер төгіп жүрген жандарға алғыс айтушылар көп. Олай деуімізге себеп, нақ мереке қарсаңында өткен жиынға «Түркістан облысы кәсіподақтар орталығы» аумақтық кәсіподақтар бірлестігінің төрағасы Б.Өмірәлі арнайы қатысып, маған және әріптесім Мейрамкул Алмуратоваға бірлестік атынан салалық кәсіподақ қозғалысының дамуына қосқан жеке үлесі үшін Құрмет грамотасымен және Республикалық «EL QURMETY» қоғамдық қорының атынан қоғамның оң бағытта қалыптасуына ықпал ететін отаншыл, кітапхана саласына қосқан еселі еңбегі үшін «Ерен еңбек иес» «Ыбырай Алтынсарин» медалін табыстады. Сонымен бірге мерекеге орайғы кәсіби іріктеудің «Жыл кітапханашысы — 2023» аталымында шығармашылық ерекшелігі үшін Ахлиукова Фаягель Фаритовна, «Үздік меңгеруші — 2023» аталымында Қайып Жансая, «Креативті кітапханашы — 2023» аталымында Мырзабаева Гульсана, «Үздік аудандық меңгеруші — 2023» аталымында Келес аудандық балалар кітапханасының меңгерушісі Мусабаева Жанар, «Үздік аудандық балалар кітапханасы — 2023» аталымында жеңімпаз танылған Сайрам аудандық балалар кітапханасы кітапханамыздың директоры Ақмарал Асанқызының арнайы Дипломымен марапатталды. Сондай-ақ облыс бойынша аудандық балалар кітапханаларының меңгерушілері де құралақан қалмай, балалар әдебиетін насихаттауда атқарып жатқан сүбелі еңбегі үшін Түркістан облыстық Мәдениет және туризм басқармасының басшысы Ә.Қойлыбаевтың Алғыс хатымен марапатталды. Кітапханамыздың директоры Ақмарал Асанқызының бастамасымен өткен салтанатты кеште осындай марапаттарды алу біз үшін сый-құрметтің үлкені еді. Иә, бұл мереке біз үшін марапат жауған мейрам болды. Әрдайым жалғасын тауып, жас ұрпақ үшін еткен еңбек елене бергей. Әсия Сәбденқұлова
