Оңтүстік Қазақстан облысына қарасты Отырар ауданындағы Отырар мемлекеттік археологиялық қорық-мұражайының «Әдебиет және өнер» ғылыми –зерттеу бөлімінің ұйымдастыруымен Ө.Жәнібеков атындағы №4 лицей – мектебінде «Шанышқылыдан шыққан Бердіқожа» тақырыбында көрме өтті. Көрменің мақсаты Жоңғарларға қарсы шайқаста қол бастаған қазақтың даңқты батырларының бірі — Бердіқожаның өмірі мен ерлігі туралы оқушыларға кеңінен насихаттау болып табылады. Көрмеде Бердіқожа батырдың батырлық, қайраткерлік тұлғасын айшықтайтын фотосуреттері қойылды. Сонымен қатар, Отырар қорық-музейінің кіші ғылыми қызметкерлері М.Сұлтанова және Ж.Өскенбаевалардың Ел тәуелсіздігі үшін басқыншы жаумен қол бастап шайқасқан Бердіқожа батырдың ерлігі туралы, алапат шайқастарда халқымыздың ерлік, елдік, патриоттық дәстүрлері қалыптасуы туралы баяндамаларын оқып, батыр бабаның елге беймәлім қырлары жөнінде тың мәліметтерді ортаға салды. Мәдени шара барысында жастар батыр бабаларының ерліктеріне куә болды. алдағы уақытта да осындай тәрбиелік мәні зор көрмелерді музей қызметкерлері көптеп ұйымдастрымақ. Осындай ержүрек батырларымызды көпшілікке насихаттау барысында ерліктің мәні елдің ынтымағы мен бірлігінде жатқанын аңғартады.
