Төлеби ауданының әкімі Төлеген Телғараевтың жеке қабылдауына келген Киелітас ауылдық округінің тұрғындары елді мекендегі бос жатқан аумақты Наурыз алаңына айналдыруға көмек сұраған болатын. Округ халқының өтінішін назардан тыс қалдырмаған аудан басшысы күл-қоқысқа толып жатқан орынды тазалап, алаң салу жөнінде шешім шығарды. Сала мамандарына тапсырма беріп, шешімнің жүзеге асу барысын өз қадағалауына алды. Нәтижесінде, Сұлтан Рабат елді мекенінің кәсіпкерлері Ділмұрат Омаров, Камал Османов, Шүкірәлі Шадманов бастаған ауыл тұрғындары бірігіп ақылдаса келе, Наурыз алаңы белгіленген орын тазаланды. Тұрғындар бірлесіп алаңды өз қаражаты есебінен көгалдандырып, абаттандырып, тал көшеттерін егу жұмыстарын жүргізді. Бүгін, Сұлтан Рабат елді мекенінің тұрғындары Наурыз алаңында «Ұлыстың ұлы күні -Наурыз» мерекесін ұйымдастырды. Мерекеге арнап дастархан жайылып, жастар арасында ұлттық ойындар ойнатылды. Мереке құрметіне тұрғындар ізгі тілектерін айтып, шағын концерт өткізіп, ұйымдастырушыларға аудан әкімінің «Алғыс хаты» табыс етілді.
