Шымкентте жаңа ипподром ашылды Шымкентте әлемдік стандарттарға сай салынған ипподром ашылды. Жаңа, заманауи ипподромның ашылуы ұлттық спорттың дамуына әсер ететіні сөзсіз. Этноауылда Наурыз мерекесіне арналған «Наурыз Шымкенттен басталады» атты іс шарасы аясында ұлттық ойындардан жарыс өтуде. Мұнда 200-ге жуық киіз үй тігіліп, алтыбақандар орнатылған. Мейрамханалар арасында ұлттық тағамдар дайындаудан жарыс өтіп жатыр. Наурыз мерекесіне орай жаңа спорт кешенінде ұлттық спорт түрлерінен халықаралық жарыс өтіп жатыр. Оған 1 мыңнан астам спортшы қатысуда. Су жаңа ипподромда еліміздегі ең үлкен бәйге алаңы бар. Ипподром аумағында 1 500 көрерменге арналған трибуна, ат аренасы бар манеждер, жабық стенд ғимараты, ветеринарлық блок қарастырылған. Көкпарға, атпен секіруге арналған алаңдар кварцты құмдармен, табиғи тастармен безендірілген. Дәл қазіргі уақытта Жамбы атудан Азия Кубогы өтіп жатыр. Аламан додаға Қырғызстан, Өзбекстан, Манғолия, Қытай, Ресей, Тәжікстан, Иордания, Польша, Сауд Арабия, Түркия мемлекеттерінен 126 спортшы бақ сынасуда. Сайыпқырандар 3 күн бойы дәстүрлі садақ атудан сайысқа түсіп, теңге ілуден жарысады. Аударыспақ пен командалық көкпардан жарыс жолына шығып, ұлттық ойынның көркін қыздырады. Ашылу салтанатынан кейін көрермендер көкпар ойынын тамашалады. Жамбыл облысының және Шымкент командасы салым салды.
Айдай Сабырбекова
