фото САОА
Адам жанының арашашысы дәрігерлер тек науқастарды емдеп қана қоймай басқа салаларда да озық екені айқын. Мәселен, спорт саласында да өз бақтарын сынап, жеңісті қолдан бермейтіндерін дәлелдеді. Жуырда «Медицина қызметкерлер күні» мерекесі қарсаңында Түркістан облысына қарасты Созақ ауданындағы аудандық орталық ауруханасында спорттық спартакиада өтті.
Айтулы мерекеге орай ұйымдастырылған сайысты аудандық орталық аурухананың басшы орынбасары Н.Өндірбеков ашып, әріптестерін кәсіби мерекесімен құттықтай отырып, еңбек жолдарына мол табыс, асқан бақыт, берекелі де, мерекелі ғұмыр, жеңісті де жемісті жұмыс атқаруды тіледі. Спартакиада аудандық аурухана және оған қарасты ЕПМ қызметкерлерінен құралған 7 команда қатысты. Барлық команда мүшелері аталмыш спорттық шараға асқан дайындықпен келген. Бәселекелестерден басып озу оңайға соқпады. Олар спорттың 6 түрінен яғни, шахмат, үстел теннисі, арқан тартыс, футбол, волейбол және қашықтыққа жүгіруден бақ сынады. Медицина қызметкерлері спорттың қай түрінен болмасын қара жаяу емес екендіктерін дәлелдеді. Ой мен логиканың жемісті ойыны шахматта бағын сынағандар епті де епсекті екендіктерін мойындатты. Ойлау қабілеті мықтыла ғана басып озатын ойында оза шапқандар аз болған жоқ. Шаңшаңдықты, дәлдікті қажет ететін үстел теннисінде де мықты ойыншылар іріктеліп келіпті. Олар осал еместіктерін мойындатып, жеңіске қол жеткізді. Арқан тартыста білекті де жүректі жігіттер шығып, нағыз ойын өрнегін көрсетті. Ал жанкүйері көп футболда жанын салып ойнағандар үздік деп танылды. Волейбол ойыны да өте тартысты өтті. Қашықтыққа жүгіруде дәрігерлер өздерінің мықты екендіктерін көрсетті.
Спартакиада соңында Созақ аудандық орталық аурухана қызметкерлері I-орынды жеңіп алса, II-орын емхана қызметкерлеріне бұйырды. Ал III-орын аудандық орталық ауруханаға қарасты Құмкент, Жарты төбе және Сызған дәрігерлік амбулаторияларынан құралған — «Бірлік» командасы иеленді. Жеңіске жеткен жеңімпаздарға және сайысқа қатысушыларға барлық командаларға қомақты сыйлықтар беріліп, алғыс хаттармен марапатталды. Жүлделі орын алған командаларға қосымша сыйлықтар табысталды. Ақшалай сыйлықтар да табысталды. Жеңіске жеткен командалар бұл жарысқа әбден дайындалғандарын айтып өтті. Адам емдеуде алғы шепте жүрген денсаулық сақшылары осылайша барлық салада да оза шауып бәйге ала алатындықтарын дәлелдеді.
