Енді тойдағы қызықты да,есте қалар оқиғаларды әлеуметтік желі арқылы жариялап ақша ұтып алуға болады. Өйткені, желі қолданушылары арасында «ONtoiжұлдыздары» атты облыстық байқау ұйымдастырылды. Шараға оңтүстікқазақстандық «НарТв» телеарнасы мен облыстық «Нұр Отан» партиясы, мәдениет және жастар саясаты, ішкі саясат басқармалары мұрындық болып отыр. Ал, байқаудың негізгі мақсаты той мәдениетін қалыптастыру. Бір күндік қызығын қырық күн ел есінде қалдыру үшін қазекем тойда тарылған емес. Бірақ, көптің көңілінен шығу үшін жасаған кейбір тірліктері талай тойдың иесін де, қонақтарын да ұятқа қалдырып жүр. Желілерде желдей ескен мұндай көріністерден қазір көз сүрінеді. Бірақ, қазақтың ғажап тойын мазаққа айналдырғандардың әрекеті тыйлар емес. Облыстық байқау енді осы жайттарға тоқтау салуды көздейді. Ерсұлтан Әмірбек – «НарТВ» телеарнасының директоры «Қалай дегенде де біз той мәдениетін қалыптастыруымыз керек. Сол үшін әлеуметтік желі қолданушылары арасында үздік жобалар бойынша барлық бұқаралық ақпарат құралдары мен осыны бір мәселе етіп көтерсек деген ортақ шешіммен бүгін сол байқауды жариялауға шешім қабылдап отырмыз». Байқауға желі қолданатын кез-келген тұрғын қатыса алады. Басты талап — тойдағы ең жақсы немесе ерсі қылықты желі арқылы жариялап қоғамға ой салу. Мәтіннің көлемі 100 әріптен кем болмауы керек. Есте сақтайтын тағы бір мәселе жазба «Ontoi» хештегімен жариялануы тиіс. Сонымен қатар, байқау кезінде өзге аймақтардың да ерекшеліктерін үлгі етіп ұсынуға болады. Той мәдениетін қалыптастыруға арналған байқауға материал жариялау бүгіннен бастап желтоқсанның онына дейін жалғасады. Жүлделі орыннан көрінгісі келетіндер аптасына 1 рет ғаламторда жазба қалдыруы керек. Байқау жеңімпаздары жыл соңына қарай белгілі болады. Ал, жүлде қоры жарты миллион теңге.
МАҚСҰТ Айтжанов
