Оңтүстік Қазақстан облыстық тарихи-өлкетану музейінің «Ерлік» филиалында Сайрам ауданының Құрметті азаматы, су саласынын майталманы, жетпіс жастың жеңістері мен жемістерін еңсерген ел ағасы, ұлтжанды ұл, еңбектегі ерлігімен көпке үлгі болып жүрген Өсетулла Жабағиев мырзамен «Жетпіс жастың жеңістері мен жемістері» тақырыбында тағылымы мол, мән-мағыналы сырласу сағаты өтті. Елбасымыздың «Болашаққа бағдар: рухани жаңғыру» мақаласында жарияланғандай, қонақтардың барлығы қысқа-нұсқа әрі мән-мағыналы сөйлеп, уақытты да тиімді әрі үнемді пайдаланды. Тәрбиесі мол бұл іс-шараға ОҚО-ның Құрметті азаматы Мархабат Байғұт мырза бастаған барша зиялы қауым өкілдері, Еңбек ардагерлері, музей саласындағы басқа аудандардан келген қызметкерлер, Облыстық тарихи-өлкетану музейінің қызметкерлері және 65-06 әскери бөлімінің сарбаздары және Өсетулла ағаның отбасы мүшелерінің қатысуымен өтті. Ұяңданып отырған қонақтар іс-шара барысында әуелетіп ән айтып, Өсетулла ағамен сыр-сұхбат өрбітті. Бас кейіпкер, ел ағасы Өсетулла Жабағиевтың біз білмейтін қыры қалмады десек те қателеспеген болар едім. Себебі, Өсетулла аға барынша ашылып, көтеріңкі көңіл-күйде отырды. Іс-шараның соңы «Наурыз 777» мейрамханасындағы дастарханда жалғасты. Өте жоғары деңгейде өткен «Жетпіс жылдың жеңістері мен жемістері» тақырыбындағы іс-шараның қонақтары дән риза болып тарқасты. Ерен ерлердің, еңбегімен ел құрметіне бөленген ата-апаларымыздың өнегелі өмірін өскелең ұрпаққа насихаттап жүрген осындай іс-шаралар әлі де жалғасын табады деген сенімдеміз.
