Еліміздің көк байрағын көкте желбіретіп, Әнұранымызды асқақтататын бірден-бір жарыс – спорт. Ал, осы спорттың әр саласы бойынша жеңімпаз атану әрбір спортшының арманы.
ОҚО Отырар ауданы әкімі Ерлан Айтаханов ауданымыздан шыққан чемпиондармен кездесіп, ауданымыздың спорт саласында жеткен жетістіктері жайында пікірлесті.
Кезінде даңқы жер жарған Қажымұқан бабамыз Отырардың ғана емес бүкіл қазақтың атын әлемге паш етті. Шойын болатты қолымен иіп, күш атасын танытқан тау тұлғалы жерлесіміздің ізбасарлары бүгінде баба ерлігін жалғастыруға күш салып келеді. Жуырда ғана жерлесіміз Перизат Жақыпбекова Белбеу күресінен Әлем чемпионатының жеңімпазы атанса, Сабыржан Әбілдаұлы Әскери қызметкерлер арасында Қазақстан Республикасы чемпионатында топ жарды. Сондай-ақ, Белбеу күресінен жасөспірімдер арасында ҚР чемпионатының +90 кг салмақ дәрежесі бойынша Ерсұлтан Жорабек жеңімпаз болса, осы сайыстың 90 кг салмақ дәрежесі бойынша Бағдәулет Шераздин жүлдегер атанды.
Сонымен қатар тоғызқұмалақтан халықаралық жарыстарда топ жарып жүрген жерлестеріміз Гүлназ Байболат пен Аружан Салман әйелдер арасында Қазақстан Республикасы Чемпионатының жеңімпаздары атанып, тоғызқұмалақтан спорт шебері атағына ие болды.
Мұнан бөлек ауданымыздың өнер саласындағы ереше қуантатын жаңалықтың бірі жақында Шымкент қаласында өткен облыстық жастар арасындағы «Алтын дауыс» байқауында өнері үздік деп танылып, жерлесіміз Аян Төлеген гран-при иегері атанды. Осылай Шәмшіні тудырған өлке әншіні де тудыра алатынын тағы да бір дәлелдеді. Басқосуда аудан әкімі Аян Төлегенге құрмет көрсетіп, «Алтын дауысты» әншіге отырарлық қолөнер шеберлері дайындаған бұйымдарды сыйға тартты.
-Отырардан спорт, өнер, ғылым қай саланың болмасын Фарабилері шыққан. Білім-ғылымның Фарабиі – Әбу Насыр әл Фараби болса, Бабтардың бабы – Арыстанбаб, Ән падишасы – Шәмші, Рух сардары – Өзбекәлі, Ақиық ақын – Мұхтар, Күш атасы – Қажымұқан, айта берсек осылай жалғасып кете береді. Тіпті спорттың өзі әр салаға бөлінеді. Сендер сол өздерің чемпион болған спорт түрлерінің Фарабилерісіңдер. Болашақта осы жетістігімізді төмендетпей одан әрі шыңдай беруге тиіспіз, — деді аудан басшысы құттықтау сөзінде.
Кездесуде чемпиондарға сый-сыйапат жасап, құрмет көрсеткен аудан әкімі спорт пен білім бәсекесінде биіктен көріне беріңдер деген тілегін жеткізді.
