фото ТОБА
Түркістан облыстық балалар ауруханасының басшысы Алтын Мейрамбайқызы Досанова ауруханадағы науқастардың жағдайын ұдайы басты назарда ұстайды. Емдеу мекемесіне түскен әрбір дертті жанның сауығып шығуы үшін дәрігерлерді жұмылдырып, барлық жұмыс барысын жіті бақылап отырады. Бұл жолғы жұмыс аптасының басында жансақтау бөлімдерін аралап, қазіргі таңдағы үдерістермен танысты.
Жансақтау бөліміндегі реаниматолог дәрігерлер басшыға науқастардың жағдайы мен жүргізілген емдік-диагностикалық шаралардың нәтижелері туралы егжей-тегжейлі баяндап берді. Әр науқасқа жеке тоқталып, түскен кездегі жағдайы мен емдеуден кейінгі жағдайын толық айтты.
Ұсынылған мәліметтерге сәйкес, бүгінде Түркістан облыстық балалар ауруханасында 18 науқас ауыр халде жатыр. Өткен демалыс күндері төрт адам бас-ми жарақаттарымен ауруханаға түскен. Олардың арасында 17 жастағы екеуі, 9 жастағы біреуі, сонымен қатар бір жасар бала бар. Олардың барлығы түрлі жағдайда жарақат алған. Олардың барлығы да дәрігерлердің жіті бақылауында тұр. Мұнда түскен барлық науқастардың сауығып, ертерек үйлеріне оралуы үшін денсаулық сақшылары барын салады.
Бұл ақпарат балалардың денсаулық жағдайын үнемі бақылау қажеттілігін және қажет болған жағдайда уақтылы білікті медициналық көмек көрсетудің маңыздылығын атап көрсетеді.
