ОҚО Бәйдібек аудандық балалар мен жасөспірімдер спорт мектептері қызметкерлерінің арасында аудандық жарыс ұйымдастырылды. Салтанатты жиынды аудан әкімінің орынбасары И.Түймебаев ашып, мерекелерімен құттықтап, жетістікке жеткен бір топ спорт саласының қызметкерлерін облыстық дене шынықтыру және спорт басқармасының «Құрмет грамотасымен» және аудан әкімінің «Алғыс хатымен» марапаттады. Ал аудандық «Нұр Отан» партиясы филиалының «Алғыс хатын» Т.Дүйсенбеков, аудандық мәслихаттың «Алғыс хатын» Т.Мақұлбеков, аудандық дене шынықтыру және спорт бөлімінің «Құрмет грамотасын» А.Атемов табыстады. Жарыс ауданымыздағы спорт кешенінде волейбол, үстел тенисі, арқан тарту, шахмат, 60 м және 100 м қашықтықтарға жүгіру сияқты спорт түрлерінен өтті. Оған ауданымыздағы бес спорт мектебінен 72 қызметкер қатысып, әр командадан 60-100 метр қашықтыққа жүгіруден 40 жастан асқан бір спортшы жарысқа түсті. Қорытындысында 60 метр қашықтыққа жүгіру-ден 1-орын №1 БЖСМ-нен Ғани Игіліковке, 2-орын №5 БЖСМ-нен Асхат Жақсыбаевқа, 3-орын №4 БЖСМ-нен Кәден Нұртаевқа бұйырса, 100 м қашықтыққа жүгіруден жастар арасында 1-орынды №4 БЖСМ-нен Шерхан Кенеханов, 2-орынды №3 БЖСМ-нен Гайдар Мырзахметов, 3-орынды №2 БЖСМ-нен Қанат Байбосынов иеленді. Арқан тарту 5 команданың айналма түрінде өтіп, 1-орынды №3 БЖСМ, 2-орын №1 БЖСМ, 3-орын №2 БЖСМ алды. Ал волейболдан 1-орынды №1 БЖСМ, 2-орынды №2 БЖСМ, 3-орынды №5 БЖСМ қанжығалады. Үстел теннисінен 1-орынға №1 БЖСМ-нен Өскен Ильясов жайғасса, шахматтан 1-орынға №3 БЖСМ-нің қызметкері Сабыр Алтынбеков лайық деп табылды. Командалық қорытынды есебі бойынша 1-орында №1 БЖСМ командасы 118 ұпаймен суырылып алға шықса, 2-орында №3 БЖСМ командасы 111 ұпайды, 3-орынды №5 БЖСМ командасы 101 ұпаймен жарысты аяқтады. Жарыс жеңімпаздары мен жүлдегерлеріне бағалы сыйлықтар мен дипломдар тапсырылды.
Сондай-ақ кәсіби мереке қарсаңында ауданымыздағы балалар аллеясының футбол алаңында кіші футболдан жастар арасында жарыс өтті. Жарысқа демеушілік жасаған ардагер спортшы Серік Тұрсынов бөлімнің «Алғыс хатымен» марапатталды. 6 команда қатысқан футбол ойынында 1-орынды «ЭКСПО — 2017», 2-орынды «Арғымақ», 3-орынды «Жалын» командалары иеленді. Лес Ерұлан, Самат Тарланов, Олжас Адырбековтар үздік ойыншылар ретінде танылды. Жарыста топ жарған командалар мен жүлдегерлер бөлімнің дайындаған кубогімен, дипломдармен және демеушінің бағалы сыйлықтарымен марапатталды.
Жібек ТОЛЫҚБАЕВА,
«Алғабас».
