фото ТОӘБҚ
Сарыағаш аудандық білім бөліміне қарасты №71 жалпы білім беретін мектебі ұлттық тәрбиеге айырықша көңіл бөліп, ұлттық құндылықтарды дәріптеуде ерекше бастама көтерді. Мектеп ұстаздары оқушылардың қоңырау уақытын пайдалы әрі қызықты өткізу мақсатында ерекше әдіс енгізді. Бұл – ұлттық тәрбиеге негізделген асық ойнау дәстүрі. Мектеп директоры қоңырау уақытында балалармен асық ойнап, ұлттық ойындарды қайта жаңғыртуда. Аталмыш бастама арқылы оқушылардың дәстүр мен мәдениетке деген құрметін арттырып қана қоймай, оларды дәлдік пен ширақ болуға машықтандырады.
Мектеп оқушылары 1000-нан аса асық жинап, ұлттық ойынмен айналысуға өздері құлшыныс танытқан. Ұлттық ойын алғаш рет мектепте ұйымдастырылған аудандық әкелер мектебінің жиынында қолдау тапты.
Қазіргі уақытта игі бастама жалғасын тапқан. Мектеп оқушылары үзіліс кезінде де асық ойнап, белсенділігін арттыруда.
– Біз балалардың ұлттық құндылықтарға жақын болуын қалаймыз. Асық ойнау тек қызықты ойын ғана емес, сонымен қатар бұл ата-бабамыздан ұрпақтан-ұрпаққа мирас болған мұра. Осы дәстүрді жаңғырту арқылы оқушыларымызды ұлттық құндылыққа, мәдениетке құрметпен қарауға тәрбиелейміз. Асық ойыны – тұнып тұрған тәрбиенің көзі. Ал білім мен тәрбие қашанда егіз болуы керек, – дейді мектеп директоры Абылай Бердихожаев.
Балаларды ұлттық спорт түріне баулыған мектеп ұстаздары «асық» спорты үшін мектепте арнайы бөлме жабдықтап, үйірме ашуды көздеп отыр. Ұлттық спорттың бұл түрі денсаулыққа тигізер пайдасынан бөлек, оқушылар арасындағы достық қарым-қатынасты нығайтады дейді. Бұл бастама ата-аналар мен оқушылардың арасында үлкен қолдау тауып, мектептің ерекшелігіне айналған. Ендігі кезекте мектеп ұжымы ұлттық ойындар тек білім ордасының аумағында ғана емес, балалардың бос уақытында да жалғасып, кеңінен таралады деген сенім білдіріп отыр.
Тамаша! Балалардың болашағы жарқын болсын!
Керемет бастама!
Керемет машаллах елимиздин жастары осе берсин
Сарыағаш қаласы 71 жалпы орта білім беретін мектеп ұжымының ұйымдастыруымен үлкен үзілісте — оқушылардың демалып, еркін уақыт өткізуіне арналған тамаша мүмкіндік.
Асық ойыны – қазақтың ұлттық мұрасы ғана емес, сонымен қатар ептілік пен дәлдікті дамытатын қызықты ойын. Мұндай дәстүрді мектеп оқушылары арасында жаңғырту – жас буынның салт-дәстүрге деген қызығушылығын арттырады. Бастысы – қауіпсіздік ережелерін сақтай отырып, мектеп ауласында ойынды ұйымдастыруда. Әрқашанда ұлттық ойындарымызды дәріптейік!
Қазақ халқының ұлттық асық ойынын жаңғырту-ұрпақ тәрбиесінің жарқын жолы. Әрбір бастаманың өз бастаушысы болады.
Осы ізгілікті істің басында жүрген, жаңалыққа, жаңашылдыққа жаны құмар мектеп басшысы Абылай Ақназарұлының басшылық қызметіне сәттілік тілеймін.