Бүгінде қазақстандық ғылымды дамыту бағытында көптеген ауқымды жұмыстар атқарылуда. Түркістандағы Қожа Ахмет Ясауи атындағы Халықаралық қазақ-түрік университетінің Археология ғылыми-зерттеу институтының ұйымдастыруымен 2023 жылдың 4 қазан күні «2023 жылы Сығанақ қаласында жүргізілген археологиялық зерттеу жұмыстарының нәтижелері» тақырыбындағы дөңгелек үстел өтті. Дөңгелек үстел отырысына Археология ғылыми-зерттеу институтының директоры, т.ғ.к., профессор Жетібаев Көпжасар Мұстафаұлы, Анкара Хажы Байрам Вели Университеті, Өнер факультетінің Мәдени мұраны сақтау және қалпына келтіру бөлімінің оқытушысы, доктор, профессор Али Акын Акиол, Археология ғылыми-зерттеу институтының бас ғылыми қызметкері, т.ғ.д., профессор Қожа Мұхтар Бахадырұлы, Археология ғылыми-зерттеу институтының жетекші ғылыми қызметкері, PhD доктор, доцент м.а. Сиздиков Багдаулет Сапарбайұлы, Археология ғылыми-зерттеу институтының жетекші ғылыми қызметкері, PhD доктор, қауымд. профессор Гурсой Музаффер, Ә.Х. Марғұлан атындағы Археология институтының ғылыми қызметкері Шагирбаев Мамбет Сапарбекұлы, Археология ғылыми-зерттеу институтының жетекші ғылыми қызметкері, PhD доктор Бахтыбаев Мэлс Mаратұлы, Археология ғылыми-зерттеу институтының ғылыми қызметкерлері Малдыбекова Ляззат Жұмағұлқызы, Амантуров Маралбек Қасымбекұлы қатысып, Қазақстан Республикасының Ғылым және жоғары білім министрлігі Ғылым комитенің нысаналы-бағдарламалық қаржыландыру аясында орындалып жатқан «ВR10965310 «Тарихи-мәдени мұра нысаны — ортағасырлық Сығанақ қалашығында кешенді археологиялық зерттеу жұмыстары” атты жоба бойынша атқарылған зерттеулер нәтижелері жайлы баяндамалар жасады. Бұдан бөлек, «Scopus — әдебиеттерді іздеу. Әдеби шолуға материал дайындау» атты онлайн-вебинар өтті. 2023 жылғы 9 қазанда Ғылым департаментінің ұйымдастыруымен Elsevier компаниясының Орталық Азия, Әзірбайжан елдері бойынша тренері PhD Айжан Салимжанованың «Scopus — әдебиеттерді іздеу. Әдеби шолуға материал дайындау» атты онлайн-вебинары өтті. Аталмыш вебинарға университетіміздің ғалымдары мен қызметкерлері қатысты. Вебинарға қатысушылар Scopus Халықаралық дерекқорлар базасына мақалаларды қалай жариялай алады және мұндай журналдарды қалай таңдауға болатыны туралы мол мәліметтер алды. Сонымен қатар өздерін қызықтырған сұрақтарын қойып, ашық пікір алмасты. Вебинар алдағы уақытта өз жалғасын табатын болады.
