Оқу мәдениетін насихаттауда кітапханашылардың атқарып отырған жұмысы орасан зор. Үлкенді құрметтеп, кішіге ізет көрсету – халқымыздың рухани дүниесінің айнымас бір бөлшегі екені анық. Осы орайда ұлы тұлғалардың ісін жалғастырған көрнекті ақын, Ұлы Отан соғысының ардагері Белгібаев Имансары Айтбайұлының туғанына 100 жыл толуына орай «Ұйқысыз өткен түндер бар, Сарғайып атқан таңдар бар» атты жаңа кітабының тұсаукесері өтті. Аталмыш шара Түркістан облысы Отырар аудандық орталық кітапханасының Отырар кітапханасында өтті. Аудандық кітапхана қызметкері Мәдина Шәріпбекова өз сөзінде бұл тағылымды рухани шараның маңызы мен мақсатына тоқталды. Бұл тұсаукесер жырлары мен толғаулары өміршең болып, ұрпаққа үлгі болып келе жатқан ақынның шығармашылығы мен мұрасына жасалған тағзым болды. Кітапханадағы кездесу жаңа кітаппен танысу ғана емес, Имансары Айтбайұлының шығармашылығын, облыстың, жалпы еліміздің мәдени мұрасына қосқан үлесін талқылап, таңдануға себеп болды. Мұндай шаралар қоғамдық кеңістікті рухани байлыққа толтырып, ұлттық мәдени мұраны сақтау мен насихаттауға септігін тигізеді. Жаңа кітаптың лентасын қию рәсімін Балапан Айтбайқызы мен аудандық ішкі саясат бөлімінің басшысы Еркебұлан Жаймұрзаев өткізді. Шара барысында көпшіліктің құрметіне бөленген ұлағатты тұлға Имансары Айтбайұлының көз көрген замандастары мен ұрпақтары ол кісі туралы әсерлі әңгімелер айтып, тебірене сыр шертумен қатар, ауданымыздың өсіп-өркендеуіне қосқан үлесі туралы сөз қозғап, өз естеліктерін бөлісті. Отырар кітапханасында еңбектерінің тұсаукесеріне арналған кешті кітап авторлары Бауыржан Имансарыұлы мен зейнеткер ұстаз Мария Имансарқызы аяқтады. Олар «Отырар» кітапханасына кітаптың бір данасын сыйға тартып, шараны өткізуге қолдау білдіріп, ұйымдастырған кітапхана ұжымына шынайы алғыстарын білдірді. Бұл кітап авторларының алғысын білдіру ғана емес, сонымен қатар шығармашылық тұлғалар мен мәдениет мекемелері арасындағы ынтымақтастық пен өзара әрекеттестіктің символы болды. Кітапханаға кітап сыйлау мәдени мұраға қосылған маңызды үлес болып табылады және кітапхана қорын құнды әдеби шығармалармен байытады. Мұндай сәттер қоғамдағы мәдени алмасу мен ынтымақтастықтың маңыздылығын көрсетеді және шығармашылық тұлғалар мен мәдени институттар арасындағы байланысты нығайтады.
